GOENCHO UGDASS
(Memories of Goa)
Poem in Konkani by Tony Fernandes
Celebrating World Goa Day - 20 August 2009
Ugddas burgeaponnailo maka sodanch eta,
Jednam xinkunk ami Escola Primaria
Barabor chollon ami vetale
Ani daktule uzar kelele cherache batlen
Slate pussunk irlexem udok ami vortale.
Primeir, segund, tercer, kaddun talle
Ladainh cantad ami kortale;
Salve kabar zalea uprant
Kotten vath pettoun
Xamainchea atik dhorun ghara vetale.
Ugddas maka sodanch eta
Novea Vorsacho ani Natalanche ratricho;
Modianichem miss zalea uprant
Vaddeantlea lokak uttoitale
Zage ravon amchea daktulea vaddeant
Cantaram korun rath sartale.
Boas Festas do Natal, Feliz Ano Novo,
Deu Boro Dis Dhium, Deu Bori Rath Dhium,
Kai borim him vinchun kaddlelim utranim
Sogleank ami vodkitaleum.
Gaunchea Festachi feri
Pollounk disso chodd bori
Khuxealkaien lok kori festachi toeiari,
Fath-gravat bandunk urba amkam etali
Ani Corar ravon amim Miss Cantad kori.
Ugddas maka sodanch eta
Ponjeche taricho ani Goencheam ferri-bottincho
Vollok korunk ek zantti maka vinchari
Baba tum khuincho?
Tor gorib aum zaun khoro
Fokannanim zabab ditalom
Ek batkar munn aum Guirvodcho.
Visronk ekdom kottin Mapxencho bazar
Kiteak khuinchoruch naslo eka tempar
Itlo voddlo mercad - kherit bazaracho dis aslo ek Sunkrar
Meutaleo vostu thuim zinsanvar
Punn atam tor teka poloixi zalear
Zaleat tache Bara Berestar ani Tera Sunkrar.
Tony Fernandes June 1989
